LEGAZPI CITY- Inasigurar kan gobierno kan Albay na preparado an probinsya engkaso mangyari an worst scenario dahilan sa padagos na ipinapahiling na abnormalidad kan Bulkan Mayon.
Sa ipinagsagibong emergency meeting ngunyan na aldaw na pinangenotan ni Gobernador Joey Sarte Salceda, APSEMO, Phivolcs, mga alkalde asin gabos na mga Municipal Disaster Coordinating Councils (MDCCs) kan mga lugar na sakop kan Mayon unit area, partikular na pinag- urulayan an manungod sa barangay evacuation plans.
Pinagrebisar man an mga designated evacuation centers na gagamiton engkaso magdeklarar na nin mass evacuation sa probinsya kun saen lampas 1000 pamilya an nakatalaan na i- ebakwar na kumpwesto man nin 6000 katao.
Pinag- urulayan man sa naunambitan na meeting an mga updated observations kan Phivolcs asin PDCC pati na kan mga member agecies kani makalihis na isakat sa alarming alert level 2 an Mt. Mayon kun saen posible ining magsabog anuman na oras.
Nakatalaan man na makipag- ulay nuodma an gobernador sa mga miembros kan AFP asin PNP ngani na diskutiron an nagkapirang pang importanteng preparasyon.
An naunambitan na emergency meeting iyu an ipinagsagibo sa Provincial Disaster Management Office (PDMO) kasabay an mga miembro kan media.